ნატოსა და ევროკავშირის შესახებ საინფორმაციო ცენტრის ორგანიზებითა და საქართველოში ნატოს სამეკავშირეო ოფისის მხარდაჭერით პედაგოგებისთვის მიმდინარეობს სემინარი „ნატო – არჩევანი მშვიდობიანი და სტაბილური განვითარებისთვის“. პროექტის ფარგლებში, სემინარის მონაწილეებს მასწავლებელთა პროფესიული განვითარების ეროვნულმა ცენტრმა უმასპინძლა, სადაც მასწავლებლები ცენტრის ექსპერტ-კონულტანტებს შეხვდნენ და პროფესიული განვითარებისთვის შექმნილი ახალი შესაძლებლობების შესახებ მიიღეს ინფორმაციას. 

პროექტში მონაწილეობას ქ. თბილისისა და დუშეთის მუნიციპალიტეტის სკოლების გეოგრაფიის, ისტორიისა და სამოქალაქო განათლების 30 პედაგოგი იღებს. სემინარის მიზანია მასწავლებლების ინფორმირება ნატოს მიზნებისა და ამოცანების, ნატო-საქართველოს ურთიერთობების მიმდინარე პროცესებისა და გლობალური უსაფრთხოების მშენებლობაში საქართველოს როლის შესახებ. 

პროექტის ფარგლებში ასევე დაგეგმილია შეხვედრები საქართველოს უსაფრთხოებისა და განვითარების ცენტრის დირექტორთან, ესტონეთის რესპუბლიკის ელჩთან პრიიტ ტურკთან, რომელიც ნატოში გაწევრიანების პროცესში ესტონეთის გამოცდილების შესახებ ისაუბრებს.

სემინარი სსიპ „ნატოსა და ევროკავშირის შესახებ საინფორმაციო ცენტრის“ ინიციატივითა და ნატოს სამეკავშირეო ოფისის მხარდაჭერით უკვე მეორე წელია იმართება.