ათასწლეულის გამოწვევის ფონდი - საქართველოსა და მასწავლებელთა პროფესიული განვითარების ეროვნულ ცენტრს შორის 2015 წლის 25 დეკემბერს გაფორმდა შეთანხმება, რომელიც ითვალისწინებს ცენტრის მიერ ათასწლეულის გამოწვევის კორპორაციის ფინანსური და ექსპერტული მხარდაჭერით 7-12 კლასების ზუსტი, საბუნებისმეტყველო მეცნიერებების, გეოგრაფიის და ინგლისურის, ასევე საჯარო სკოლის დირექტორების პროფესიული განვითარების ხელშეწყობას.

მრავალი კვლევის შედეგად დადასტურებულია, რომ ტექნიკური მიმართულებებში მოსწავლეთა მაღალი შედეგები ხელს უწყობს ქვეყნის ეკონომიკურ განვითარებას. სწორედ ტექნიკურ მიმართულებებში მოსწავლეთა აკადემიური შედეგების გაუმჯობესებას ისახავს მიზნად პროგრამა მოსწავლეზე ორიენტირებული სასწავლო პროცესის უზრუნველყოფის ხელშეწყობის გზით.

პროგრამის სამიზნე ჯგუფს წარმოადგენენ:

• 7-12 კლასების მათემატიკის, ფიზიკის, ბიოლოგიის, ქიმიის, გეოგრაფიის. ინგლისურის მასწავლებლები
• პროფესიული განვითარების ფასილიტატორები (სკოლიდან ერთი)
• საჯარო სკოლის დირექტორები

საერთო ჯამში პროგრამის ფარგლებში 25 000 მდე სპეციალისტი გაივლის გრძელვადიან მომზადებას, რომელიც ტრენინგების მიღმა მოიცავს სასწავლო შეხვედრებს, რესურსების განვითარებას და ახალი პრაქტიკის სასკოლო გარემოში დანერვის ხელშეწყობას.

პროგრამას ექსპერტულ დახმარებას უწევს ორგანიზაცია IREX, რომელსაც საგანმანათლებლო პროექტებზე მუშაობის მრავალწლიანი გამოცდილება გააჩნია. უცხოელი და ქართველი სპეციალისტებისგან შემდგარი პროგრამის ჯგუფი უზრუნველყოფს მასწავლებელთა და დირექტორთა პროფესიული განვითარების ახალი პრაქტიკის დანერგვას და გრძელვადიანი, მდგრადი პროფესიული განვითარების სისტემურობას.

მასწავლებელთა და სკოლის დირექტორთა პროფესიული განვითარების პროექტი