მასწავლებელთა პროფესიული განვითარების ეროვნულ ცენტრს, ოფიციალური ვიზიტის ფარგლებში, ათასწლეულის გამოწვევის კორპორაციის დელეგაცია და მისი ხელმძღვანელი, კორპორაციის აღმასრულებელი დირექტორის მოადგილე, ნენსი ლი ეწვია. დელეგაცია ათასწლეულის გამოწვევის მეორე კომპაქტის ფარგლებში დაფინანსებულ, „მასწავლებელთა და სკოლის დირექტორთა პროფესიული განვითარების პროექტს“ გაეცნო. პროექტი მასწავლებელთა პროფესიული განვითარების ეროვნული ცენტრის მიერ, 2015 წელს, ცენტრსა და „ათასწლეულის გამოწვევის ფონდი - საქართველოს“ შორის გაფორმებული მემორანდუმის თანახმად ხორციელდება.

პროექტის ფარგლებში, ყველა საჯარო სკოლის დირექტორი გადის ლიდერობის აკადემიის ტრენინგებს, ხოლო 20 000-მდე ზუსტი და საბუნებისმეტყველო საგნების, გეოგრაფიისა და ინგლისური ენის მე-7-12 კლასების მოქმედი მასწავლებელი სამი წლის განმავლობაში პროფესიული განვითარების კურსს გაივლის.  

მეორე კომპაქტი ათასწლეულის გამოწვევის კორპორაციის პირველი ინვესტიციაა, რომელიც მხოლოდ განათლებას ეხება. კომპაქტი 2014 წელს დაიწყო. მისი ბიუჯეტი $140 მილიონ აშშ დოლარს შეადგენს და მიზნად ისახავს საბუნებისმეტყველო, საინჟინრო და ტექნოლოგიური (STEM) განათლების ხარისხის გაუმჯობესებას სტრატეგიული ინვესტიციების მეშვეობით. ინვესტიცია მიმართულია განათლების სხვადასხვა დონის განვითარებისთვის და ეხება ისეთ მოწყვლად ჯგუფებს, როგორებიცაა ქალები და სოციალურად დაუცველი პირები.

ინვესტიცია ეყრდნობა იმ დასაბუთებულ ვარაუდს, რომ საინჟინრო და ტექნოლოგიურ სფეროებში მიღებული უკეთესი განათლების მქონე პროფესიონალები ხელს შეუწყობენ საქართველოში გრძელვადიან ეკონომიკურ ზრდას, რომლითაც სარგებელს მიიღებს 17 მილიონი საქართველოს მოქალაქე.

2006 წლიდან, ათასწლეულის გამოწვევის კორპორაცია და საქართველოს მთავრობა ერთად მუშაობს ეკონომიკური ზრდის, სიღარიბის დაძლევისა და ქართველი ხალხის პოტენციალის გამოვლენის წახალისებისთვის. ბოლო ათი წლის განმავლობაში, პირველი და მეორე კომპაქტის შემდეგ, ათასწლეულის გამოწვევის კორპორაციას, დაახლოებით, $600 მილიონი აშშ დოლარის ინვესტიცია აქვს განხორციელებული. აღნიშნული მხარდაჭერა გამოხატავს აშშ–სა და საქართველოს შორის მტკიცე პარტნიორობასა და საქართველოს მოქალაქეების მიმართ თანადგომას.