“არაქართულენოვანი სკოლების მასწავლებელების პროფესიული განვითარების პროგრამის” ფარგლებში მიმდინარე სახელმწიფო ენის კურსში ჩართულმა მასწავლებლებმა საბოლოო შეფასება გაიარეს. შეფასება წერითი და ზეპირი ნაწილისგან შედგებოდა. კურსში ჩართული 619 ადგილობრივი მასწავლებლისგან, შეფასება გაიარა 572-მა მსმენელმა. ამ ეტაპზე მიმდინარეობს შედეგების ანალიზი. საბოლოო შეფასების შედეგად გამოვლენილ წარმატებულ მასწავლებლებს გადაეცემათ შესაბამისი დონის დამადასტურებელი სერტიფიკატი, ასევე მათთვის დაიგეგმება პროფესიული უნარ-ჩვევების ტრენინგი.

აღსანიშნავია, რომ არაქართულენოვანი სკოლების ადგილობრივი მასწავლებლებისთვის წელს პირველად იქნა შეთავაზებული სახელმწიფო ენის შემსწავლელი კურსი, რომელიც მიზნად ისახავს სახელმწიფო ენის ცოდნის დონის გაუმჯობესებას და სამოქალაქო ინტეგრაციის ხელშეწყობას, რაც, თავის მხრივ, ხელს შეუწყობს ეთნიკური უმცირესობების წარმომადგენელი მასწავლებლების ჩართულობის ზრდას მასწავლებლის საქმიანობის დაწყების, პროფესიული განვითარებისა და კარიერული წინსვლის სქემაში.

კურსის ფარგლებში, ეთნიკური უმცირესობებით კომპაქტურად დასახლებული რეგიონების (ქვემო-ქართლი, სამცხე-ჯავახეთი, კახეთი) საჯარო სკოლების მოქმედ პრაქტიკოს მასწავლებლებს მასწავლებელთა პროფესიული განვითარების ეროვნული ცენტრი სთავაზობს სახელმწიფო ენის ა1 და ა2 დონეების შესწავლას და პროფესიული უნარ-ჩვევების ტრენინგების ადგილზე გავლას.