მასწავლებელთა პროფესიული განვითარების ეროვნული ცენტრის პროგრამის - „ასწავლე და ისწავლე საქართველოსთან ერთად“ მოხალისე და ადგილობრივი მასწავლებლების ინიციატივითა და ორგანიზებით, რუსთავის N7 საჯარო სკოლაში ინგლისური ენის თამაშით სწავლების მიზნით „მხიარული სტარტები“ გაიმართა.

მე-5 და მე-6 კლასის მოსწავლეებმა ინგლისური ენის ცოდნის დემონსტრირება სხვადასხვა ტიპის სპორტული აქტივობებით მოახდინეს. მოსწავლეები ერთმანეთს ეჯიბრებოდნენ როგორც ინდივიდუალურად, ისე წყვილებში.

აღსანიშნავია, რომ კონკურსში ჩართულნი იყვნენ მშობლებიც. შეჯიბრების დასასრულს გამარჯვებულ გუნდს გარდამავალი თასი გადაეცა, ხოლო მეორე ადგილზე გასული გუნდი მოხალისე მასწავლებელმა სამახსოვრო საჩუქრებით დააჯილდოვა.

პროგრამა „ასწავლე და ისწავლე საქართველოსთან ერთად“ 2011 წლიდან ხორციელდება. მისი მიზანია ხელი შეეწყოს სკოლის მოსწავლეებში, მასწავლებლებსა და ადგილობრივ თემში სხვადასხვა უცხოური ენის ცოდნის დონის ამაღლებას და სოციალურ-კულტურული ღირებულებების ურთიერთგაცვლის პროცესს.