მასწავლებელთა პროფესიული განვითარების ეროვნულმა ცენტრმა მასწავლებლებს ცენტრის მიერ გამოცემული ნათარგმნი და ქართველი ავტორების მიერ შექმნილი დამხმარე პროფესიული ლიტერატურა წარუდგინა. ცენტრმა სამი საგანმანათლებლო რესურსი წარადგინა: ევროსაბჭოს პუბლიკაციების ნაკრები „ქარტია ყველასათვის“; „გეოგრაფია - მეთოდური მასალები მასწავლებლებისთვის“ და „სწავლების მეთოდები უსინათლო და მცირემხედველი მოსწავლეებისთვის“.

აღნიშნული ლიტერატურა განკუთვნილია მასწავლებლებისთვის, მასწავლებელთა ტრენერებისა და განათლების სფეროში მოღვაწე სპეციალისტებისთვის.

ევროსაბჭოს მიერ შემუშავებული საგანმანათლებლო რესურსების მიზანია სწავლების პროცესში დემოკრატიული ღირებულებების დამკვიდრება, ადამიანის უფლებების სწავლება და ამ გზით დემოკრატიული საზოგადოების შენება. პუბლიკაციები „ევროპის საბჭოს ქარტიის - განათლება დემოკრატიული მოქალაქეობისათვის და ადამიანის უფლებების სწავლება“ გამარტივებულ ვერსიას წარმოადგენს, რომელსაც თან ახლავს ქარტიის დანერგვის გზამკვლევი, პოსტერი და სამუშაო ბარათები.

„გეოგრაფია - მეთოდური მასალები მასწავლებლებისათვის“ - პუბლიკაცია დაეხმარება გეოგრაფიის პედაგოგებს სასწავლო პროცესის უფრო მრავალფეროვნად, საინტერესოდ, ხალისიანად და შედეგიანად წარმართვაში. წიგნი მოიცავს როგორც მეთოდურ რესურსებსა და რეკომენდაციებს, ასევე, საგაკვეთილო პროცესში გამოყენებისთვის განკუთვნილ საინტერესო საკითხავ მასალას.

ქართველი ავტორების მიერ შეიქმნა პროფესიული სახელმძღვანელო „სწავლების მეთოდები უსინათლო და მცირემხედველი მოსწავლეებისთვის“, რომელიც განკუთვნილია მხედველობის პრობლემების მქონე ბავშვებთან სამუშაოდ. პუბლიკაცია პედაგოგებს დაეხმარება მოსწავლეთა შესაძლებლობების გამოვლენაში, მათთვის ცოდნის ეფექტიანად მიწოდებასა და თანაბარი ჩართულობისათვის ყველაზე შესაფერისი სასწავლო გარემოს შექმნაში.

აღნიშნული პუბლიკაციები საქართველოს ყველა საჯარო სკოლას უსასყიდლოდ გადაეცემა.