მენტორ მასწავლებლებსა და მაძიებლებს პროგრამაში მონაწილეობის დამადასტურებელი სერტიფიკატები გადაეცათ. 2013 -2014 წელს მაძიებლობის სახელმწიფო პროგრამაში 123 მენტორი და 283 მაძიებელი იყო ჩართული, რომელთაც სერტიფიკატები მასწავლებელთა პროფესიული განვითარების ეროვნული ცნეტრის დირექტორმა გია მამულაშვილმა გადასცა.

 

მენტორ მასწავლებელი არის პედაგოგი, რომელსაც უფლება აქვს დამწყებ მასწავლებელს (მაძიებელს) ასწავლოს და მასთან ერთად წარმართოს საგაკვეთილო პროცესი. მენტორი ხდება მხოლოდ სერტიფიცირებული პედაგოგი და მას ხელფასზე 250 ლარიანი დანამატი აქვს. მაძიებლებს კი პროგრამის წარმატებით გავლის შემდეგ მიღებული გამოცდილება სტაჟში ეთვლებათ.

მაძიებლობის პროგრამა მომავალ მასწავლებლებს ერთწლიანი სტაჟის მიღებასთან ერთად პედაგოგიური უნარების განვითარებაში ეხმარება. გარდა ამისა პროგრამის მონაწილეები საგაკვეთილო პროცესის ეფექტურად დაგეგმვას და ჩატარებასაც სწავლობენ, რაც მათ შემდგომში დასაქმებასა და კვალიფიკაციის ამაღლებაში ეხმარებათ, ასევე მაძიებლებს წლის განმავლობაში ჩაუტარდათ ტრენინგები შემდეგი მიმართულებით:

• საორიენტაციო ტრენინგი „ესგ, ზოგადი განათლების მიზნები და მისი შესრულების გზები“;
• ტრენინგი პროფესიულ უნარებში „სასწავლო პროცესის დაგეგმვა, მართვა, შეფასება“;
• „მაძიებლების პედაგოგიური უნარ-ჩვევების განვითარების ხელშეწყობა რეფლექსიის გზით“.

პროგრამა საქართველოში 2010 წლიდან ხორციელდება. მიმდინარეობს მუშაობა მაძიებლის სტანდარტის განახლებულ ვერსიაზე, რომელიც შესაბამისობაში იქნება მასწავლებლის სტანდარტთან და სხვა ნორმატიულ დოკუმენტებთან.