მასწავლებლის სახლში პედაგოგებისთვის ღია კარის დრე გაიმართა, რომელზეც მასწავლებელთა პროფესიული განვითარების ახალი სქემა განიხილეს. პედაგოგები მასწავლებლის ოთხსაფეხურიანი პროფესიული სტანდარტის სამუშაო ვერსიას გაეცნენ, რომელიც საფუძვლად უდევს სქემას და უახლოეს მომავალში დამტკიცდება. პრეზენტაციის დასრულების შემდეგ მასწავლებელთა პროფესიული განვითარების ეროვნული ცენტრის წარმომადგენელმა თითოეული პედაგოგის შეკითხვებს უპასუხა მათ დოკუმენტის შესახებ ამომწურავი ინფორმაცია მიაწოდა.

შეხვედრის მიზანია, პედაგოგთა პროფესიული სტანდარტის სამუშაო ვერსიის პრაქტიკოსი მასწავლებლებისთვის გაცნობა და მომავალ სამუშაო დოკუმენტთან დაკავშირებით მათი მოსაზრებების, შენიშვნების მოსმენა და გათვალისწინება.

პროფესიული განვითარების სქემაში ჩართვით მასწავლებლებს ექნებათ შესაძლებლობა კვალიფიკაცია და სტატუსი აიმაღლონ, რითაც ხელს შეუწყობენ განათლების დონის ამაღლებას. ახალი სქემის მიხედვით პედაგოგები კატეგორიიდან კატეგორიაში გადასვლას ბევრად უფრო მცირე ვადებში შეძლებენ, ვიდრე ეს ამჟამად მოქმედი პროფესიული განვითარების სქემით არის განსაზღვრული. საბოლოოდ, კარიერული ზრდა მასწავლებლის ხელფასის ზრდასთან იქნება დაკავშირებული.

პედაგოგებთან სამუშაო შეხვედრები საქართველოს სხვადასხვა რეგიონში გაგრძელდება და ყველა პედაგოგს მიეცემა შესაძლებლობა ჩაერთოს ზემოაღნიშნულ მნიშვნელოვან დოკუმენტზე მუშაობის პროცესში.