მასწავლებლის სახლი პედაგოგებს ახალ მომსახურებას, Skype კონსულტაციას სთავაზობს. კონსულტაციის მიმდინარეობას დღეს განათლებისა და მეცნიერების მინისტრი და სამინისტროს მასწავლებელთა პროფესიული განვითარების ეროვნული ცენტრის დირექტორი დაესწრნენ. Skype ვიდეო ზარით დღეს თბილისის 143-ე და წეროვანის მე-3 საჯარო სკოლების პედაგოგებმა ისარგებლეს.

დღეიდან ნებისმიერ პედაგოგს მასწავლებლის სახლის საგნობრივ კონსულტანტებთან გასაუბრება Skype-ით შეეძლებათ.

ეს სიახლე მათ საშუალებას მისცემს, როგორც საკუთარ საგანში, ისე პროფესიულ უნარებში არსებულ ნებისმიერ კითხვაზე უმოკლეს დროში მიიღოს პასუხი. კონსულტაციის მისაღებად თითოეული მათგანი მასწავლებელთა პროფესიული განვითარების ეროვნული ცენტრის ვებ-გვერდზე (www.tpdc.ge) უნდა დარეგისტრირდეს.

მასწავლებლის სახლი პედაგოგებს Skype ვიდეო ზარის გარდა კონსულტანტებთან პირად შეხვედრებსაც სთავაზობს. შეხვედრაზე დასასწრებად ნებისმიერმა დაინტერესებულმა პედაგოგმა რეგისტრაცია ცენტრის ვებ-გვერდზე უნდა გაიაროს.