საქართველო, როგორც ევროსაბჭოს წევრი ქვეყანა, ენობრივად და კულტურულად მრავალფეროვან სივრცეში იმყოფება. უცხოური ენების ცოდნის გარეშე შეუძლებელია ამ სივრცეში ინტეგრირება და საკუთარი პიროვნული შესაძლებლობების სრულფასოვანი რეალიზება, ამიტომაც განათლებისა და მეცნიერების სამინისტროს სტრატეგიული გეგმის მიხედვით, ზოგად საგანმანათლებლო დაწესებულებებში უდიდესი ყურადღება უცხოური ენების სწავლების ხელშეწყობას ექცევა. ამ მიმართულებით 2011 წლიდან გარკვეული ცვლილებები შევიდა ეროვნულ სასწავლო გეგმაში. კერძოდ, ინგლისური ენა, როგორც პირველი უცხოური ენა პირველი კლასიდან გახდა სავალდებულო, მეორე უცხოური ენა დაწყებითი საფეხურის მეხუთე კლასიდან იწყება. ეროვნული სასწავლო გეგმა ასევე ითვალისწინებს მესამე უცხოური ენის სწავლების შესაძლებლობას ზოგადსაგანმანათლებლო დაწესებულებაში.

აღნიშნულმა ცვლილებებმა, ბუნებრივია, გარკვეული გამოწვევები გააჩინა სისტემაში: დღის წესრიგში დადგა პედაგოგების მიერ შესაბამისი პედაგოგიური უნარების დახვეწისა და სასწავლო რესურსების გამოყენების ცოდნის აუცილებლობა. აქცენტი კეთდება საკომუნიკაციო ენის სრულყოფილ ცოდნასა და პრაქტიკულ გამოყენებაზე.

არსებული გამოწვევების საპასუხოდ, 2010 წელს საქართველოს განათლებისა და მეცნიერების სამინისტროს ინიციატივით განხორციელდა პროექტი, რომლის ფარგლებშიც საქართველოს ყოველწლიურად ინგლისურენოვან მოხალისეთა ჯგუფი სტუმრობს, მოხალისეები ცხოვრობენ მასპინძელ ოჯახებში და დასაქმებული არიან საჯარო სკოლაში, სადაც უცხოური ენის ადგილობრივ მასწავლებლებთან და თემის სხვა წევრებთან თანამშრომლობით აქტიურად ერთვებიან სასკოლო და სათემო ცხოვრებაში. უცხოელ კოლეგებთან ერთად ადგილობრივი პედაგოგები ითავისებენ უცხოური ენის შესწავლის კომუნიკაციური მეთოდის უპირატესობას, სასკოლო სახელმძღვანელოების ეფექტურ გამოყენებას, მოიძიებენ და დაამუშავებენ მოსწავლეთა საჭიროებებიდან გამომდინარე დამატებით მასალებს და აქტიურად ჩაერთვებიან სასწავლო პროცესის ყველა ეტაპზე. მოხალისე პედაგოგთა საქმიანობა სამ ძირითად მიმართულებას მოიცავს:

პედაგოგებთან თანამშრომლობა და მათი პროფესიული განვითარების ხელშეწყობა უცხოური ენის სწავლების შემდეგი მიმართულებით: მოსმენა, კითხვა, წერა, ლაპარაკი, სწავლის სწავლა, კულტურათა დიალოგი, უცხოური ენის პრაქტიკული გამოყენება;

• მოსწავლეებში უცხოური ენის ცოდნის დონის ამაღლება;
• ინტერკულტურული, საგანმანათლებლო და შემეცნებითი ღონისძიებების ჩატარება (სასკოლო კლუბები, საზაფხულო ბანაკები და სხვა).  

2015 წლიდან პროგრამაში ინგლისურენოვან მოხალისე მასწავლებლებთან ერთად ჩაერთვებიან სხვა უცხოური ენის მასწავლებლები, რათა ხელი შეეწყოს სკოლის მოსწავლეებში, მასწავლებლებსა და ადგილობრივ თემში სხვადასხვა უცხოური ენის ცოდნის დონის ამაღლებასა და კულტურული და სოციალური ღირებულებების ურთიერთგაცვლის პროცესს, რაც გლობალურ სივრცეში საზოგადოების ინტეგრირების წინაპირობაა.