პროფესიული განათლების მასწავლებელთა და დირექტორთა განვითარების სახელმწიფო პროგრამამ პროფესიული საგანათლებლო დაწესებულების მასწავლებლის პროფესიის რეგულირების დოკუმენტზე და მეწარმეობის ტრენინგების პილოტირების ანალიზზე მუშაობა დაასრულა. მუშაობის შედეგები, დღეს, პროგრამის თემატური ჯგუფის შეხვედრაზე განიხილეს.

პროფესიული განათლების მასწავლებელთა მომზადებისა და განვითარების მიმართულებით სახელმწიფო აქტიურად თანამშრომლობს საერთაშორისო ორგანიზაციებთან. აღსანიშნავია, რომ პროფესიის რეგულირების დოკუმენტი შემუშავდა ევროკავშირის ტექნიკური დამხმარების პროექტის მხარდაჭერით, ასევე, საერთაშორისო ექსპერტებისა და სხვა დონორი ორგანიზაციების ჩართულობით, ხოლო მეწარმეობის ტრენინგების პილოტი განხორციელდა სავაჭრო-სამრეწველო პალატისა და მიუხენის ხელოსანთა პალატის ხელშეწყობით.

პროფესიული განათლების მასწავლებლებისათვის განკუთვნილი მეწარმეობის ტრენინგები პროგრამაში სიახლეა და მისი მიზანია, მასწავლებლებსა და სტუდენტებში მეწარმეობის საბაზისო უნარების განვითარება, რათა ხელი შეეწყოს მათ შემდგომ დასაქმებას და თვითდასაქმებას შრომის ბაზარზე. ახალი ტრენინგმოდული გერმანელი ექსპერტების ჩართულობით შემუშავდა და პილოტირებაში ორი პროფესიული საგანათლებლო დაწესებულება - კოლეჯი „მერმისი“ და გლდანის პროფესიული სწავლების ცენტრი ჩაერთო.