„ათასწლეულის გამოწვევის ფონდი - საქართველოს“ მასწავლებელთა და სკოლის დირექტორთა პროფესიული განვითარების პროექტი, რომელსაც მასწავლებელთა პროფესიული განვითარების ცენტრი ახორციელებს, აჭარის რეგიონში  სწავლა-სწავლების ხარისხის გაუმჯობესებისა და სკოლის მართვის ხარისხის დახვეწის მიზნით მასწავლებლებისთვის ტრენინგებს მართავს. 

ორდღიან ტრენინგს, მოსწავლეზე ორიენტირებული სწავლების მეთოდებში ამჟამად ბათუმის, ქობულეთის, ქედას და ხელვაჩაურის მე-7-12 კლასების ზუსტი და საბუნებისმეტყველო საგნების, გეოგრაფიისა და ინგლისურის ენის 500-ზე მეტი პედაგოგი გადის.   

მასწავლებელთა გადამზადება ზოგადპროფესიული უნარების კურსის პირველ მოდულში „მოსწავლეზე ორიენტირებული სასწავლო გარემოს მახასიათებლები“ მიმდინარეობს. აღნიშნული ტრენინგ-მოდული 12 საკონტაქტო საათისგან შედგება და  დატვირთულია პრაქტიკული სამუშაოებით.

მასწავლებელთა პროფესიული განვითარების გრძელვადიანი კურსი ზოგადპროფესიული უნარების სამი მოდულისა და საგნობრივი მეთოდიკის მოდულისგან შედგება. კურსი თითოეული ნაკადისთვის 9 თვეზეა გაწერილი და მოიცავს ტრენინგზე შეძენილი ცოდნისა და უნარების სასკოლო გარემოში დანერვის ხელშეწყობას.  

კურსს სერტიფიცირებული ტრენერები უძღვებიან, რომლებიც მასწავლებელთა პროფესიული განვითარების ეროვნული ცენტრის ტრენერთა სკოლაში გადამზადდნენ.

ათასწლეულის გამოწვევის ფონდი - საქართველოს „მასწავლებელთა და სკოლის დირექტორთა პროფესიული განვითარების პროექტი“ ხორციელდება სსიპ მასწავლებელთა პროფესიული განვითარების ეროვნული ცენტრის მიერ, ათასწლეულის გამოწვევის კორპორაციის ფინანსური მხარდაჭერითა და განათლებისა და მეცნიერების სამინისტროსთან თანამშრომლობით.