„არაქართულენოვანი სკოლების მასწავლებლების პროფესიული განვითარების პროგრამის” ფარგლებში მიმდინარე ტრენერთა ტრენინგი დასრულდა. ტრენინგის მონაწილეები, რომლებიც პროგრამის არაქართულენოვანი დამხმარე მასწავლებლები არიან, უახლოეს მომავალში არაქართულენოვანი მასწავლებლებისთვის განკუთვნილ ტრენინგებში ფასილიტატორის რანგში ჩაერთვებიან და ენობრივი ბარიერის წარმოქმნის შემთხვევაში ტრენინგების მონაწილეებს დაეხმარებიან.
ამ ეტაპზე, "არაქართულენოვანი სკოლების მასწავლებლების პროფესიული განვითარების პროგრამის" ფარგლებში, 23 ფასილიტატორი გადამზადდა.
არაქართულენოვანი მასწავლებლებისთვის განკუთვნილი ტრენინგ-მოდულს „სასწავლო პროცესის დაგეგმვა, მართვა და შეფასება“ ის მასწავლებლები გაივლიან, რომლებმაც ქართული ენის კურსის გავლის შედეგად, ქართული ენის ფლობა A2 დონეზე დაადასტურეს. ტრენინგები მათ ქართულ ენაზე ჩაუტარდებათ.
მასწავლებელთა პროფესიული განვითარების ეროვნული ცენტრი 2016 წლიდან ახორციელებს არაქართულენოვანი სკოლების მასწავლებლების პროფესიული განვითარების პროგრამას, რომელიც მოიცავს გასულ წლებში განხორციელებულ პროგრამებს: "ვასწავლოთ ქართული, როგორც მეორე ენა" (2009-2015წწ) და "ქართული ენა მომავალი წარმატებისთვის" (2011-2015წწ). პროგრამის მიზანია არაქართულენოვანი სკოლების/სექტორების მასწავლებლების პროფესიული განვითარების ხელშეწყობა და სწავლა-სწავლების ხარისხის გაუმჯობესება, სახელმწიფო ენის სწავლების გაძლიერების გზით.
|
01 დეკემბერი , 2016
