ქალაქ ვარშავაში, პროგრამაში - “eTwinning Plus” ჩართული, სხვადასხვა ევროპული ქვეყნის მასწავლებლებისთვის სემინარი გაიმართა. სემინარში საქართველოდან პროგრამის კოორდინატორი და პროგრამაში რეგისტრირებული ორი მასწავლებელი სოფიკო ვაშაკიძე და ნადია დაბრუნდაშვილი მონაწილეობდა.

სემინარის მიზანი იყო საუკეთესო პრაქტიკისა და იდეების გაზიარება, ასევე პროგრამის მონაწილეთა მიერ დაგეგმილი ღონისძიებების გაცნობა. მასწავლებელთა პროფესიული განვითარების ხელშეწყობის მიზნით, მასწავლებლებისთვის შეთავაზებული იყო სხვადასხვა ტიპის ვორქშოფები ბრიტანელი და პოლონელი ამბასადორების მიერ, რაც მათ eTwining Plus-ის პორტალზე აქტიურად მუშაობასა და საინტერესო პროექტების განხორციელებაში დაეხმარებათ.

სემინარის მონაწილეებს საშუალება ჰქონდათ, გაეცნოთ ევროპელი კოლეგები, ჩამოეყალიბებინათ საერთო ინტერესები, ხედვა და ახალი საპროექტო იდეები. ქართველმა მასწავლებლებლებმა პოლონელ, სლოვაკ და ხორვატიელ კოლეგებთან ერთად იმუშავეს ახალი პროექტის გეგმაზე, მისი განხორციელების ეტაპებზე და დაგეგმეს შესაბამისი აქტივობები. სემინარში, ევროპის სხვადასხვა ქვეყნიდან 70-მდე მასწავლებელი მონაწილეობდა.

პროგრამა “eTwinning Plus” ევროპისა და მისი მეზობელი ქვეყნების სკოლების თანამშრომლობის ხელშეწყობის მიზნით შექმნილი საგანმანათლებლო ქსელია, რომლის ფარგლებში მასწავლებლები ერთმანეთს უკავშირდებიან, თანამშრომლობენ, ერთობლივ სასწავლო პროექტებს ახორციელებენ და გამოცდილებას უზიარებენ. პროგრამა თავის საქმიანობას ახორციელებს ონლაინ-პლატფორმის საშუალებით, რომელიც პროგრამის მონაწილე მასწავლებლებისთვის სამუშაო სივრცეს ქმნის და მათ მრავალფეროვან ინსტრუმენტებს სთავაზობს საკუთარი ამოცანების განხორციელებისათვის.