მასწავლებელთა პროფესიული განვითარების ეროვნულმა ცენტრმა, მასწავლებლის საქმიანობის დაწყების, პროფესიული განვითარებისა და კარიერული წინსვლის სქემაში ჩართული პედაგოგებისთვის განკუთვნილი გზამკვლევი ამჯერად ახალი ფორმატით - ბროშურების სახით გამოსცა. აღნიშნული პუბლიკაციები 3 ნაწილად - პრაქტიკოსი, უფროსი და წამყვანი მასწავლებლისთვის არის შექმნილი და სტატუსის შესაბამის განმარტებებსა და რეკომენდაციებს იძლევა. დამხმარე რესურსი მასწავლებელთა პროფესიული განვითარების ცენტრის დირექტორმა, გიორგი მაჩაბელმა ტყიბულის მუნიციპალიტეტის სოფელ საწირეს საჯარო სკოლის მასწავლებლებს პირადად გადასცა და სკოლაში სქემის დანერგვის პროცესის შესახებ სკოლის ადმინისტრაციისა და პედაგოგების მოსაზრებებს გაეცნო.

მასწავლებელთა პროფესიული განვითარების ეროვნულმა ცენტრმა სქემაში ჩართული მასწავლებისთვის აქამდე გზამკვლევის ორი ნაწილი შეიმუშავა, რომელშიც დეტალურადაა ასახული სქემის განხორციელების ყველა ეტაპი და მასში ჩართული პირების საქმიანობის განხორციელების გზები. ცენტრის ხელმძღვანელობის განცხადებით, გზამკვლევის ბროშურების სახით შექმნის მიზანია, მასწავლებლებმა საკუთარი სტატუსის მიხედვით, უფრო მარტივად მოიძიონ და გაეცნონ პროფესიული განვითარების სხვადასხვა აქტივობების შესახებ ინფორმაციას და ცენტრის ექსპერტთა რეკომენდაციებს.

გარდა გზამკვლევისა, ცენტრი მასწავლებლებსა და სკოლის ადმინისტრაციას სხვა სახის დახმარებასაც სთავაზობს. მათ შორისა კონსულტირება, ტრენინგები და სხვა ხელშემწყობი ღონისძიებები.