მასწავლებელთა პროფესიული განვითარების ეროვნულმა ცენტრმა უცხოენოვანი მოხალისეების შერჩევის პროცესი დაიწყო. 60-მდე ინგლისურ, ფრანგულ და გერმანულენოვანი მოხალისის შერჩევა პროგრამის „ასწავლე და ისწავლე საქართველოსთან ერთად“ ფარგლებში იგეგმება.

პროგრამის მენეჯერის, თეა ვახტანგაძის განმარტებით, უცხოენოვანი მოხალისეების შერჩევის კრიტერიუმები შეიცვალა და გარდა იმისა, რომ რომელიმე ზემოთჩამოთვლილი ენა მოხალისესთვის მშობლიურ ენას უნდა წამოადგენდეს, მას ასევე მოეთხოვება სწავლების გამოცდილებაც, რასაც პროგრამა აქამდე არ ითვალისწინებდა.

ამჟამად პროგრამის ფარგლებში, საქართველოს სხვადასხვა სკოლებში 41 მოხალისე ასწავლის.

პროგრამა „ასწავლე და ისწავლე საქართველოსთან ერთად“ უცხოური ენების სწავლა-სწავლების პროცესის ხელშეწყობის, მასწავლებელთა უწყვეტი პროფესიული განვითარების, სასწავლო პროცესში მრავალფეროვანი პედაგოგიური მეთოდების დანერგვისა და უცხოური ენის პრაქტიკული გამოყენების უზრუნველყოფის მიზნით ხორციელდება.