საგანმანათლებლო ტექნოლოგიების კონფერენციის ფარგლებში გალა-საღამო გაიმართა, რომელზეც კონფერენციის მონაწილეები დაჯილდოვდნენ. ფულადი ჯილდო გადაეცა 10 მომხსენებელს „ლიბერთი ბანკისგან“, მათ შორის კონფერენციაზე პირველ რეგისტრირებულ მასწავლებელს.

კომპანია „ესაბისა“ და „ინტელისგან“ პორტატული პერსონალური კომპიუტერი, პლანშეტები და ფოტოაპარატები მიიღეს საჩუქრად პოსტერების გამოფენის სამმა მონაწილე მასწავლებელმა.

კომპანია „მაიკროსოფტმა“ საჩუქრები გადასცა კონფერენციის ფარგლებში ჩატარებულ "Mix"-ის კონკურსში გამარჯვებულ ორ მასწავლებელს. გამარჯვებულები კომპანიებმა და შეფასების კომისიამ ერთობლივად გამოავლინეს.

საგანმანათლებლო ტექნოლოგიების კონფერენცია მასწავლებელთა პროფესიული განვითარების ეროვნული ცენტრის ორგანიზებით უკვე მესამე დღეა მიმდინარეობს. მასში 250-ზე მეტი ინფორმაციულ-საკომუნიკაციო ტექნოლოგიების სპეციალისტი, ექსპერტი და პედაგოგი მონაწილეობს.

კონფერენციის მიზანია სასწავლო პროცესში ინფორმაციულ-საკომუნიკაციო ტექნოლოგიების გამოყენების საუკეთესო პრაქტიკისა და გამოცდილების გაზიარება, ასევე სფეროში არსებული ინოვაციების შესახებ დაინტერესებული მხარეების ინფორმირება.

კონფერენციის სპონსორები და მხარდამჭერები არიან ინტელი, მაიკროსოფტი, ესაბი და ლიბერთი ბანკი.