მასწავლებელთა პროფესიული განვითარების ეროვნული ცენტრის დირექტორის მოადგილე ირინა აბულაძე, ცენტრის მიზნობრივი პროგრამების სამსახურის უფროსი და სახელმწიფო პროგრამის „ქართული ენა მომავალი წარმატებისთვის“ თანამშრომლები ზურაბ ჟვანიას სახელობის სახელმწიფო ადმინისტრირების სკოლის დირექტორს ქეთევან ჯაყელს და სკოლის წარმომადგენლებს შეხვდნენ.

სამუშაო შეხვედრის მიზანი იყო ეთნიკური უმცირესობებით დასახლებული რეგიონების (ქვემო ქართლი, სამცხე-ჯავახეთი და კახეთი) არაქართულენოვანი სკოლების ადგილობრივი მასწავლებლების პროფესიული განვითარების ხელშეწყობა, ქართული ენის ფლობისა და სწავლა-სწავლების გაუმჯობესების მიზნით, ქართული ენის კურსების ჩატარება და სამომავლო ურთიერთანამშრომლობის დაგეგმვა. აღნიშნული შეხვედრა მასწავლებელთა პროფესიული განვითარების ეროვნულ ცენტრსა და ზურაბ ჟვანიას სახელობის სახელმწიფო ადმინისტრირების სკოლას შორის გაფორმებული მემორანდუმის ფარგლებში გაიმართა.

საქართველოს განათლებისა და მეცნიერების სამინისტრო ერთიან პოლიტიკას ახორციელებს ეროვნული უმცირესობების სამოქალაქო ინტეგრაციის მიზნით. საქართველოში მცხოვრები ეთნიკური უმცირესობების სახელმწიფო ენის სწავლებისა და სამოქალაქო ინტეგრაციის ხელშეწყობის მიზნით ტარდება ისეთი კომპლექსური ღონისძიებები, რომლებიც უზრუნველყოფს განათლების ხელმისაწვდომობას ეთნიკური უმცირესობებისთვის, ხელს უწყობს სახელმწიფო ენის პოპულარიზაციასა და ასევე, ეროვნული უმცირესობების ენობრივი და კულტურული თვითმყოფადობის შენარჩუნებას.