კულტურის ცენტრში „მუზა“ გაიხსნა და მთელი საქართველოს მასშტაბით მიმდინარეობს “საქართველოს ბავშვთა და ახალგაზრდული საგუნდო კოლექტივების პირველი ეროვნული კონკურსი“. კონკურსის გახსნას მასწავლებელთა პროფესიული განვითარების ეროვნული ცენტრის მუსიკის ექსპერტ-კონსულტანტი რუსუდან თაყაიშვილი და ცენტრის წარმომადგენლები ესწრებოდნენ.

კონკურსი საქართველოს საგუნდო საზოგადოების, თბილისის ვანო სარაჯიშვილის სახელობის სახელმწიფო კონსერვატორიის, ევგენი მიქელაძის სახელობის ცენტრალური სამუსიკო სასწავლებლისა და საქართველოს ფოლკლორის სახელმწიფო ცენტრის ინიციატივით ხორციელდება.

კონკურსის მიზანია:

• აკადემიური საგუნდო სიმღერის პოპულარიზაცია;
• ეროვნული სასიმღერო ტრადიციების დაცვა;
• ქართველი კომპოზიტორების შემოქმედების პოპულარიზაცია;
• ბავშვთა და ახალგაზრდული საგუნდო კოლექტივების მხარდაჭერა და მონიტორინგი.

კონკურსში მონაწილეობს 260 საგუნდო კოლექტივი, აქედან 116 ზოგადსაგანმანათლებლო სკოლა. 90 სამუსიკო, სახელოვნებო, სამგალობლო, ფოლკლორული სკოლა-სტუდია და 54 მოყვარულთა გუნდი.

30 მარტს, თბილისის სახელმწიფო კონსერვატორიის მცირე დარბაზში ჩატარდება გალა კონცერტი და მოხდება გამარჯვებულთა დაჯილდოება.

კონკურსის მხარდამჭერები არიან საქართველოს განათლებისა და მეცნიერების სამინისტრო, სსიპ მასწავლებელთა პროფესიული განვითარების ეროვნული ცენტრი, კულტურისა და ძეგლთა დაცვის სამინისტრო, ქალაქ თბილისის მერია და საპატრიარქოს ახალგაზრდული ცენტრი.