მასწავლებლის სახლში „მასწავლებელთა მომზადების, პროფესიული განვითარებისა და კარიერული ზრდის კონცეფცია“ განიხილეს. განათლებისა და მეცნიერების რეფორმების სახელმწიფო კომისიის მიერ მომზადებულ დოკუმენტზე დღეს მისი ავტორები, მასწავლებელთა პროფესიული განვითარების ეროვნული ცენტრის წარმომადგენლები და სკოლების პედაგოგები მსჯელობდნენ. შეხვედრაში მონაწილეობა skype-თ განათლებისა და მეცნიერების რეფორმების სახელმწიფო კომისიის ხელმძღვანელმა გია დვალმაც მიიღო.

კომისიის მიერ მომზადებული დოკუმენტი რამდენიმე ძირითად მიმართულებას ეფუძნება:

· პედაგოგების უწყვეტი კარიერული ზრდა;

· სასკოლო გარემოს გაუმჯობესება;

· პედაგოგის პროფესიის პრესტიჟის გაზრდა;

· სერტიფიცირების ფორმატის განახლება 2015 წლიდან;

· საუნივერისტეტო განათლება;

· მჭიდრო თანამშრომლობა სკოლას, უნივერსიტეტებსა და სამეცნიერო კვლევით ინსტიტუტებს შორის და სხვა.

შეხვედრაზე პედაგოგებმა კონცეფციასთან დაკავშირებულ კითხვებზე პასუხები თავად ავტორებისგან მიიღეს და მათ საკუთარი მოსაზრებები გაუზიარეს. დოკუმენტი განათლებისა და მეცნიერების რეფორმების სახელმწიფო კომისიის ზოგადსაგანმანათლებლო მიმართულების სამუშაო ჯგუფმა შეიმუშავა, რომელშიც მასწავლებელთა პროფესიული განვითარების ეროვნული ცენტრის წარმოამდგენლებიც იყვნენ ჩართულები.