საქართველოში ევროკავშირის წარმომადგენლობასთან თანამშრომლობით, მასწავლებელთა პროფესიული განვითარების ეროვნული ცენტრი ახორციელებს პროექტს „ევროპა ჩემს გაკვეთილზე“. პროექტის მიზანია, ხელი შეუწყოს ევროკავშირთან ასოცირების შეთანხმებით განსაზღვრულ საქმიანობას და ევროპის შესახებ სწავლებას სკოლებში.
პროექტის ფარგლებში ცხადდება კონკურსი „ევროპა ჩემს გაკვეთილზე“.
პროექტში მონაწილეობის მიღება შეუძლია როგორც საჯარო, ისე კერძო სკოლის სხვადასხვა საგნისა და სტატუსის მასწავლებელს. მსურველებმა უნდა გამოგზავნონ მათ მიერ შექმნილი თამაში, აქტივობა, გაკვეთილის გეგმა ან პროექტი, რომლის მიზანიც, საგნობრივი ცოდნის გადაცემის გარდა, ევროპის შესახებ სწავლება და მოსწავლეებში ევროპული ღირებულებების განვითარება იქნება.
საკონკურსო ნამუშევრები შესაძლოა გულისხმობდეს კოლეგასთან, სკოლის ადმინისტრაციასთან ან თემთან თანამშრომლობას, სხვადასხვა კლასის მოსწავლეების ჩართვას პროექტში, ან მოიცავდეს მასწავლებლის მუშაობას მხოლოდ საკუთარ კლასთან. მიიღება როგორც უკვე განხორციელებული პროექტები და ჩატარებული გაკვეთილები, ასევე, საპროექტო წინადადებები და საგაკვეთილო გეგმები. უპირატესობა მიენიჭება ინოვაციურ, ორიგინალურ იდეებს.
საუკეთესო ნამუშევრების გამოყენებით, შეიქმნება ტრენინგმოდული, ჩატარდება ტრენინგები და მომზადდება პუბლიკაცია.
საკონკურსო ნამუშევრების გაგზავნის წესები:
- საკონკურსო ნამუშევრები უნდა გამოაგზავოთ შემდეგ ელექტრონულ მისამართზე: info@tpdc.ge
- სათაურის ველში მიუთითეთ კონკურსის დასახელება
- საკონკურსო ნამუშევარს თან უნდა ახლდეს მასწავლებლის საკონტაქტო ინფორმაცია
ნამუშევრების მიღების ბოლო ვადა: 2017 წლის 11 ივნისი.
22 მაისი , 2017
