„ათასწლეულის გამოწვევის ფონდი - საქართველოს“ მასწავლებელთა და სკოლის დირექტორთა პროფესიული განვითარების პროექტის ფარგლებში, რომელსაც მასწავლებელთა პროფესიული განვითარების ცენტრი ახორციელებს, საქართველოს მასშტაბით 48 მასწავლებელს ტრენინგი თემაზე „უსაფრთხოება სასკოლო საბუნებისმეტყველო ლაბორატორიებში“  ჩაუტარდა.

ტრენინგ-მოდული  პროექტის საბუნებისმეტყველო საგნების სპეციალისტთა ხელმძღვანელობით და ამერიკის შეერთებული შტატების ლაბორატორიული უსაფრთხოების ინსტიტუტის წარმომადგენლთან თანამშრომლობით შემუშავდა.

ტრენინგზე ფიზიკის, ქიმიისა და ბიოლოგიის მასწავლებლები გაეცნენ სასკოლო ლაბორატორიებში მუშაობისას უსაფრთხოების ზოგად წესებს, რათა მათ გამოუმუშავდეთ სასკოლო საბუნებისმეტყველო ლაბორატორიებში უსაფრთხოდ მუშაობის უნარ-ჩვევები.

საბუნებისმეტყველო ლაბორატორიები მნიშვნელოვანი რესურსია სკოლებისთვის და მათი აქტიური გამოყენება სასწავლო პროცესში ეფექტიანი სწავლებისთვის ერთ-ერთი აუცილებელი პირობაა. აღნიშნულმა, დღის წესრიგში დააყენა ლაბორატორიებში მუშაობისას უსაფრთხოების საკითხი. შედეგად, შეძენილი ცოდნის საფუძველზე პედაგოგები სასწავლო პროცესის მიმდინარეობისას, სასკოლო საბუნებისმეტყველო ლაბორატორიებში მოსწავლეთათვის  უსაფრთხო გარემოს შექმნიან.

„ათასწლეულის გამოწვევის ფონდი - საქართველო“ „ათასწლეულის გამოწვევის კორპორაციის“ დაფინანსებით 100-მდე საჯარო სკოლის სრულ რეაბილიტაციას ახორციელებს, რომლის ფარგლებშიც, ასევე, დაგეგმილია სკოლების თანამედროვე საბუნებისმეტყველო ლაბორატორიებით აღჭურვა. პროექტის ფარგლებში უკვე რეაბილიტირებულია 12 საჯარო სკოლა (ბებნისის, გორის #5, ზერტის, თიანეთის #1, ოკამის, საქაშეთის, სკრის, ტინისხიდის, ტყვიავის, ფხვენისის, ძეგვისა და ხიდისთავის საჯარო სკოლები) და აღნიშნული ტრენინგი სწორედ ამ სკოლების მასწავლებლებმა გაიარეს.

სამომავლოდ დაგეგმილია მასწავლებლებისთვის სასკოლო საბუნებისმეტყველო ლაბორატორიაში სასწავლო პროცესის წარმართვისთვის საგნობრივი გზამკვლევის შექმნა და ამ მიმართულებით ტრენინგების ჩატარება.

ათასწლეულის გამოწვევის ფონდი - საქართველოს „მასწავლებელთა და სკოლის დირექტორთა პროფესიული განვითარების პროექტი“ ხორციელდება სსიპ მასწავლებელთა პროფესიული განვითარების ეროვნული ცენტრის მიერ, ათასწლეულის გამოწვევის კორპორაციის ფინანსური მხარდაჭერითა და განათლებისა და მეცნიერების სამინისტროსთან თანამშრომლობით.