მასწავლებელთა პროფესიულ განვითარების ეროვნულ ცენტრში, საგნობრივ ასოციაციებთან სამომავლო თანამშრომლობის გზებისა და საშუალებების გაცნობის მიზნით, საინფორმაციო შეხვედრა გაიმართა.

შეხვედრაზე განიხილეს, თუ როგორი უნდა იყოს ასოციაციების როლი საგანმანათლებლო სისტემაში და როგორ შეიძლება ჩაერთონ ისინი გადაწყვეტილების მიღების პროცესებში. მასწავლებელთა საგნობრივი ასოციაციები მნიშვნელოვან რესურსს წარმოადგენს განათლების ხარისხის გაუმჯობესების საკითხში, სწორედ, ამის გამო, მასწავლებელთა პროფესიული განვითარების ეროვნული ცენტრი გეგმავს ამ თანამშრომლობის სტიმულირებას სხვადასხვა კონკურსის გზით.

საგნობრივი ასოციაციების ჩართულობა მნიშვნელოვანია განათლების სფეროში შემუშავებული სხვადასხვა დოკუმენტებისა და სასწავლო რესურსების ხარისხის გაუმჯობესებისათვის. ამჟამად, მიმდინარეობს ეროვნული სასწავლო გეგმის რევიზია. ეს დოკუმენტი საფუძვლად დაედება მასწავლებლის პროფესიულ სტანდარტში ცვლილებას, რომლის შემუშავებასა და განვითარებაზე ცენტრია პასუხისმგებელი. სწორედ, საგნობრივი გაერთიანებები შეძლებენ, ამ პროცესში მასწავლებელთა ჩართულობის გაზრდით, ცენტრისთვის დახმარების გაწევას.

მსგავს საინფორმაციო შეხვედრებს, დაგეგმილი სიახლეების შესახებ, მუდმივი ხასიათი ექნება.