მასწავლებელთა პროფესიული განვითარების ეროვნულმა ცენტრმა რეგიონში დასაქმებული სპეციალური მასწავლებლებისთვის სასწავლო ტური ჩაატარა. ტურის მიზანი იყო რეგიონების საჯარო სკოლების ინკლუზიური განათლების სპეციალისტების ცოდნისა და პროფესიული უნარების გაუმჯობესება და ამ გზით, ინკლუზიური განათლების ხარისხის განვითარების ხელშეწყობა.

პროექტში, სხვადასხვა რეგიონების საჯარო სკოლებში დასაქმებული ინკლუზიური განათლების 30-მდე სპეციალისტი ჩაერთო, რომლებმაც თბილისის 10 საჯარო სკოლაში, პროექტის ტუტორებად შერჩეულ ინკლუზიური განათლების მასწავლებლებთან პრაქტიკული კურსი გაიარეს.

ერთკვირიანი ტურის ფარგლებში, პროექტის მონაწილეებს, თავდაპირველად, შესაძლებლობა ჰქონდათ, განეხილათ საკუთარ სკოლებში არსებული გამოწვევები და მიდგომები, ხოლო შემდგომ, გაცნობოდნენ წარმატებულ ინკლუზიურ კლასებს, ინტეგრირებული კლასის სპეციფიკას და სპეციალურ სკოლას. სასწავლო ტური დასრულდა შემაჯამებელი შეხვედრით, რომელზეც მონაწილეებმა განიხილეს განვლილი მასალა და მიღებული გამოცდილება, გარდა ამისა, საკუთარი სკოლისთვის შეიმუშავეს ინკლუზიური გარემოს შექმნის გეგმა.

მასწავლებელთა პროფესიული განვითარების ეროვნული ცენტრი აქტიურად მუშაობს ინკლუზიური განათლების საკითხებზე და ამ მიმართულებით სპეციალისტების გადამზადებაზე. გარდა ზემოაღნიშნული სასწავლო ტურისა, ცენტრში პერიოდულად ტარდება ინკლუზიური განათლების სპეციალისტების ტრენინგები, ჟესტური ენის კურსები ყრუ პირების, მათი მასწავლებლებისთვის, ოჯახის წევრებისა და თარჯიმნებისათვის, ასევე ბრაილის შრიფტისა და მის სწავლების მეთოდების ტრენინგები მხედველობის დარღვევის მქონე პირთა პედაგოგებისთვის.