მასწავლებელთა პროფესიული განვითარების ეროვნული ცენტრმა საქართველოს მასშტაბით, ყველა არაქართულენოვანი სკოლისა და სასკოლო სექტორის მასწავლებლებისთვის მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის დოკუმენტების კრებულისა და გზამკვლევის I ნაწილის აზერბაიჯანული, რუსული და სომხური თარგმანების დარიგება დაიწყო.

მასწავლებელთა პროფესიული განვითარების ეროვნული ცენტრის დირექტორი გიორგი მაჩაბელი და დირექტორის მოადგილე მანანა რატიანი დღეს თბილისის N64 საჯარო სკოლის არაქართულენოვანი სექტორის მასწავლებლებს შეხვდნენ და დამხმარე ლიტერატურა პირადად გადასცეს.

აღნიშნული ლიტერატურა „არაქართულენოვანი სკოლების მასწავლებლების პროფესიული განვითარების პროგრამის“ ფარგლებში ითარგმნა და განკუთვნილია 293 სკოლის 6902 არაქართულენოვანი მასწავლებლისთვის. მიმდინარე კვირის განმავლობაში კრებული და გზამკვლევი 27 საგანმანათლებლო რესურს-ცენტრსა და მათ სამოქმედო ტერიტორიაზე არსებულ არაქართულენოვან სკოლებს გადაეცემა.

ცენტრმა გასულ წელს მოამზადა მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის ძირითადი დოკუმენტების, თვითშეფასების კითხვარისა და სქემის გზამკვლევის I ნაწილის თარგმანის ელექტრონული ვერსიები, რომელიც ცენტრის ოფიციალურ ვებგვერდზეა განთავსებული. გარდა ამისა, მომზადდა სქემის ვიდეო-ინსტრუქციის რუსულ, სომხურ და აზერბაიჯანულენოვანი ვერსიები სუბტიტრებით.

„არაქართულენოვანი სკოლების მასწავლებლების პროფესიული განვითარების პროგრამის“ მიზანია არაქართულენოვანი სკოლებისა და სასკოლო სექტორების მასწავლებლების პროფესიული განვითარების ხელშეწყობა და სწავლა-სწავლების პროცესის გაუმჯობესება სახელმწიფო ენის სწავლების გაძლიერების გზით.