დამწყებ მასწავლებელთა მხარდაჭერის პროგრამის ფარგლებში პროგრამის შუალედურ შედეგებთან და სამომავლო განვითარებასთან დაკავშირებით სამდღიანი სამუშაო შეხვედრა გაიმართა. შეხვედრაში პროგრამის კოორდინატორი, პროგრამის ტრენერ-კონსულტანტები, პროგრამის მონაწილე მასწავლებლები და მასწავლებელთა პროფესიული განვითარების ეროვნული ცენტრის სხვა თანამშრომლები მონაწილეობდნენ.

შეხვედრის ფარგლებში განხორციელდა პროგრამის მონაწილეთა პროფესიული საჭიროებების ზოგადი ანალიზი და სამომავლო მოდულების პროექტებზე მუშაობა. გარდა ამისა, ტრენერ-კონსულტანტებმა პრეზენტაციების სახით წარმოადგინეს პროგრამის ფარგლებში განხორციელებული ტრენინგების, კონსულტაციებისა და გაკვეთილებზე დაკვირვების შედეგები. პრეზენტაციების ფორმატში გააცნეს თავიანთი საქმიანობა შეხვედრის მონაწილეებს დამწყებმა მასწავლებლებმაც და შეაჯამეს საკუთარი პროფესიული გამოცდილება. პროგრამის მონაწილე მასწავლებლები ასევე გაეცნენ მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის ფარგლებში პროფესიული განვითარების გზას.

სამუშაო შეხვედრის ბოლოს შემუშავდა დამწყები მასწავლებლების საჭიროებაზე ორიენტირებული მოდულების მონახაზი და მათი განხორციელების ფორმატი.

დამწყებ მასწავლებელთა მხარდაჭერის პროგრამა მიმდინარე სასწავლო წლიდან საპილოტე რეჟიმში ამოქმედდა და მიზნად ისახავს 2 წლამდე სტაჟის მქონე, ახალბედა მასწავლებლების ხელშეწყობას ტრენინგების, სემინარების, ვორქშოფების, კონფერენციებისა და ინდივიდუალური კონსულტაციების განხორციელების გზით.