მასწავლებელთა პროფესიული განვითარების ეროვნული ცენტრის მხარდაჭერით, „საქართველოს დებატებისა და განათლების ინსტიტუტმა“ ტრენინგი სასკოლო კლუბების მართვის შესახებ დაიწყო. ტრენინგში აღმოსავლეთ და დასავლეთ საქართველოს სკოლების ადმინისტრაცია, უფროსი და წამყვანი მასწავლებლები მონაწილეობენ.
პროექტის რეგიონული კლუბების/წრეების პლატფორმა, მიზნად ისახავს საკლუბო/საწრეო საქმიანობის განვითარებას სკოლებში, მოსწავლეთა თვითრიალიზაციის ხელშეწყობას, მათ ჩართვას სასკოლო აქტივობებში და ამ გზით, სასკოლო ცხოვრების გამრავალფეროვნებას.
ტრენინგების ციკლი 4 თვის განმავლობაში, მთელი საქართველოს მასშტაბით გაიმართება და მასში მონაწილეობას 500 მასწავლებელი მიიღებს.
„საქართველოს დებატებისა და განათლების ინსტიტუტი“ მასწავლებელთა პროფესიული განვითარების ეროვნულ ცენტრში პროფესიული განვითარების პროგრამების შესარჩევ საგრანტო კონკურსში გამარჯვებული ორგანიზაციაა. კონკურსი ცენტრმა მიმდინარე წლის 21 ივნისს გამოაცხადა, რომლის მიზანია, მომსახურების გარე მიმწოდებლების ჩართულობით, მასწავლებელთა პროფესიული განვითარების ხელშეწყობა და მრავალფეროვანი, ინოვაციური მიდგომების წახალისება.
მომსახურების დეცენტრალიზაციის პროცესი მასწავლებელთა პროფესიული განვითარების ეროვნულმა ცენტრმა 2016 წლის ბოლოს დაიწყო და სამომავლოდ არაერთ მსგავს ღონისძიებას გეგმავს.
|
30 აგვისტო , 2017
