საქართველო ევროსაბჭოს პროგრამა „პესტალოცის“ სამდღიან შეხვედრას მასპინძლობს. ვორქშოფი მასწავლებელთა პროფესიული განვითარების ეროვნული ცენტრის ორგანიზებით 28 აპრილს დაიწყო და 30 აპრილამდე გასტანს. მასში 16 საერთაშორისო, მათ შორის ევროსაბჭოს ტრენერი და 20 ქართველი მასწავლებელი მონაწილეობს.
ვორქშოფი განათლებისა და მეცნიერების მინისტრის მოადგილემ ქეთევან ნატრიაშვილმა და მასწავლებელთა პროფესიული განვითარების ეროვნული ცენტრის დირექტორმა გიორგი მაჩაბელმა გახსნეს. შეხვედრაზე უწყვეტი პროფესიული განვითარების საკითხებისა და მასწავლებელთა ინდივიდუალური საჭიროებების იდენტიფიცირების მექანიზმების განხილვის გარდა, მასწავლებელთა პროფესიული განვითარებისა და კარიერული წინსვლის ახალი სქემაც წარმოადგინეს, რომელიც ახალი სასწავლო წლიდან ამოქმედდება.
პროგრამა ,,პესტალოცი” განათლების პროფესიონალთა ტრენინგების პროგრამაა. პროგრამის მიზანია, ხელი შეუწყოს განათლების პოპულარიზაციას, კერძოდ, მასწავლებელთა უწყვეტი პროფესიული განვითარების პროცესს პედაგოგების, ტრენერების და განათლების სპეციალისტებისტებისათვის პროფესიული ზრდის საშუალებების შეთავაზების გზით.
“პესტალოცის” ფარგლებში ქართველ მასწავლებლებს საშუალება ეძლევათ ითანამშრომლონ ევროპელ კოლეგებთან, დაამყარონ პროფესიული კავშირები ევროპის სხვადასხვა ტიპის სკოლების მასწავლებლებთან და განათლების სპეციალისტებთან, რათა ერთობლივად დაგეგმონ საგანმანათლებლო პროგრამები. პროგრამის ტრენინგებისა და სამუშაო შეხვედრების ძირითადი თემატიკაა სამოქალაქო საზოგადოების ფორმირების ხელშეწყობა სკოლებში, ადამიანთა უფლებების სწავლება და დემოკრატიული საზოგადოების მშენებლობა.
|
29 აპრილი , 2015
