მასწავლებლის საქმიანობის დაწყების, პროფესიული განვითარებისა და კარიერული წინსვლის ახალ სქემას და მასწავლებელთა შეფასების ელექტრონულ სისტემას, ამჯერად შიდა ქართლის რეგიონის მასწავლებლები გაეცნენ. რეგიონის ფარგლებში პირველი საინფორმაციო შეხვედრა კასპის მუნიციპალიტეტის საჯარო სკოლების დირექტორებთან და მასწავლებლებთან გაიმართა. სქემის ეტაპები და ელექტრონული სისტემის ფუნქციონირების დეტალები პედაგოგებს მასწავლებელთა პროფესიული განვითარების ეროვნული ცენტრის უწყვეტი პროფესიული განვითარების პროგრამის კოორდინატორმა ირინა სამსონიამ გააცნო.

შეკრებილმა აუდიტორიამ სრული ინფორმაცია მიიღო სქემის თითეული ეტაპის, ახალი ელექტრონული სისტემის დანიშნულებისა და მიზნების შესახებ. შეხვედრა მოგვიანებით კითხვა-პასუხის რეჟიმში გაგრძელდა.

მასწავლებლის საქმიანობის დაწყების, პროფესიული განვითარებისა და კარიერული წინსვლის ახალი სქემის მიზანია თანასწორობისა და სამართლიანობის პრინციპის დაცვით, პედაგოგთა კვალიფიკაციის ამაღლება, პროფესიული განვითარება, კარიერული წინსვლა და განათლების სისტემის თანამედროვე გამოწვევების შესაბამისად ხარისხის გაუმჯობესება. კარიერული წინსვლა ადეკვატურად აისახება მასწავლებლის შრომის ანაზღაურებაზე, რაც პროფესიაში ახალგაზრდების მოსაზიდად ერთ-ერთ მნიშვნელოვან სტიმულად იქცევა.

ახალი სქემა მორგებულია არაქართულენოვან მასწავლებლებზეც და მათ პროფესიული განვითარებისა და კარიერული წინსვლის ხელშეწყობის დამატებით მექნიზმებს სთავაზობს, ასევე განსაკუთრებულად აქცენტირებულია ქართული ენის კომპეტენციების განვითარების საკითხი აღნიშნული კატეგორიის პედაგოგებისთვის.

მასწავლებლის საქმიანობის დაწყების, პროფესიული განვითარებისა და კარიერული წინსვლის სქემა 2015-2016 სასწავლო წლის დასაწყისიდან ამოქმედდება.