მასწავლებელთა პროფესიული განვითარების ეროვნულ ცენტრში პროგრამის „ასწავლე და ისწავლე საქართველოსთან ერთად“ მოხალისე მასწავლებელთა დაჯილდოვება გაიმართა. ღონისძიება საქართველოს განათლებისა და მეცნიერების მინისტრის მოადგილემ, ლია გიგაურმა გახსნა.

ღონისძიების ფარგლებში სერტიფიკატები სულ 55 მოხალისე მასწავლებელს გადაეცა. აქედან იმ 15 პედაგოგს, რომლებიც მონიტორინგის საფუძველზე საუკეთესო შედეგებით გამოირჩეოდნენ სპეციალური საჩუქრებიც გადასცეს. გარდა ამისა პრიზებით დაჯილდოვდა პროგრამის ფარგლებში გამოცხადებული ესეების კონკურსის გამარჯვებული 3 მოსწავლე. პროგრამის „ასწავლე და ისწავლე საქართველოსთან ერთად“ წარმომადგენლებმა ასევე საჩუქრები გადასცეს იმ 10 თანამასწავლებელსაც, რომლებიც მოხალისე პედაგოგებთან მუშაობის პროცესში განსაკუთრებულად ეფექტურად თანამშრომლობდნენ.

2013-2014 სასწავლო წელს პროგრამაში მონაწილეობდა ინგლისური ენის 120 მოხალისე მასწავლებელი. მათგან 40 მოხალისე წელს ასრულებს თავის საქმიანობას და ბრუნდება სამშობლოში.

პროგრამა ,,ასწავლე და ისწავლე საქართველოსთან ერთად” გულისხმობს უცხოელი მოხალისე-მასწავლებლების საქართველოში ჩამოყვანას და მათ საჯარო სკოლებში განაწილებას ინგლისური ენის სწავლების მიზნით. პროგრამის ფარგლებში დასაქმებული უცხოელი მოხალისე მასწავლებლები ინგლისური ენის სწავლებას ახორციელებენ ყველა იმ საჯარო სკოლაში, სადაც ამის საჭიროება არსებობს.

ასევე 2013 წლიდან ჩინეთის რესპუბლიკის საელჩოს ინიციტივით და მათივე დაფინანსებით, ჩინური ენის სწავლების მიზნით პროგრამაში ჩაერთო ჩინელი მოხალისეები, რომლებიც განაწილებულნი არიან თბილისის საჯარო სკოლებსა და უნივერსიტეტებში.