მასწავლებელთა პროფესიული განვითარების ეროვნული ცენტრის ეგიდით მასწავლებლის პროფესიული განვითარების ფასილიტატორის ტრენინგების ციკლი მიმდინარეობს. ფასილიტატორის ტრენინგები„მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის“ ფარგლებში ხორციელდება. სატრენინგო კურსის განმავლობაში ფასილიტატორები შეისწავლიან, თუ როგორ დაეხმარონ კოლეგებს შეფასების ინსტრუმენტების გამოყენებაში, რათა მათ ობიექტურად და გააზრებულად შეაფასონ საკუთარი საქმიანობა და გამოვლენილი საჭიროებების მიხედვით შეიმუშაონ ინდივიდუალური სამოქმედო გეგმა.

ტრენინგს წლის ბოლომდე ეტაპობრივად სკოლების მიერ არჩეული მასწავლებლის პროფესიული განვითარების 4000 - მდე ფასილიტატორი გაივლის.

ფასილიტატორების ტრენინგების პარალელურად, მასწავლებელთა პროფესიული განვითარების ეროვნული ცენტრი ნებისმიერ დაინტერესებულ პირს სთავაზობს ტრენინგს: მასწავლებლის თვითშეფასების კითხვარი და პროფესიული განვითარების ინდივიდუალური სამოქმედო გეგმა.

ტრენინგის მონაწილეები:

• გაიაზრებენ თვითშეფასებას, როგორც მასწავლებლის პროფესიული ზრდის ერთ-ერთ ეფექტიან მექანიზმს;
• გაეცნობიან თვითშეფასების მეთოდებს;
• გაეცნობიან მასწავლებლის თვითშეფასების კითხვარის სტრუქტურას, შინაარსს და შეძლებენ მის პრაქტიკულ გამოყენებას;
• გაეცნობიან მასწავლებლის პროფესიული განვითარების ფორმებს;
• გაეცნობიან პროფესიული განვითარების ინდივიდუალურ სამოქმედო გეგმას და შეძლებენ მის პრაქტიკულ გამოყენებას.

მოდულის მოცულობაა 8 საკონტაქტო და 5 არასაკონტაქტო საათი. ტრენინგი ფასიანია. თბილისში ტრენინგის ღირებულებაა 32 ლარი. ხოლო რეგიონში - 40 ლარი.