საქართველოს განათლებისა და მეცნიერების სამინისტროს მიერ ინიცირებული რეფორმები მიმართულია ზოგადი განათლების სისტემის განვითარებისა და საჯარო სკოლებში სწავლა-სწავლების ხარისხის გაუმჯობესებისკენ. მიუხედავად იმისა, რომ არაერთი ნაბიჯი გადაიდგა ამ მიმართულებით, ერთ-ერთ პრობლემად კვლავ რჩება კვალიფიციური კადრების მოზიდვა საქართველოს შორეული და მაღალმთიანი რაიონების სკოლებში, სადაც სწავლების ხარისხი ჯერ კიდევ ჩამორჩება დადგენილ სტანდარტებს. არის შემთხვევები, როცა სკოლას არ ჰყავს ამა თუ იმ საგნის მასწავლებელი, ასევე ხშირია შემთხვევა, როცა მასწავლებელი ასწავლის საგანს არა სპეციალობით. არსებულ ვითარებას ადასტურებს ის შეუვსებელი ვაკანსიები, რომლებიც ქვეყნდება ცენტრის მიერ შექმნილ მასწავლებელთა ვაკანსიების ვებ-გვერდზე (www.pedagogi.ge) და ფიქსირდება პროგრამის მონაცემთა ბაზაში. ასეთი სიტუაცია, ბუნებრივია, იწვევს სწავლის ხარისხის დაქვეითებას.

მასწავლებელთა ყველაზე მწვავე ნაკლებობა შეიმჩნევა ისეთ რაიონებში, როგორიცაა: შუახევი, ხულო, ხელვაჩაური, ჩოხატაური, ჭიათურა, ბორჯომი, ახალქალაქი, ახმეტა, სიღნაღი, წალკა, მარნეული, დმანისი, ქარელი, დუშეთი, ამბროლაური, ონი, ცაგერი, მარტვილი, მესტია, აბაშა და სხვა.

მასწავლებლების ვაკანსიების გეოგრაფიული განაწილების თავისებურების გამო, მნიშვნელოვანია ენერგიული, კვალიფიციური კადრების შერჩევა, მათთვის საორიენტაციო ტრენინგების ჩატარება და იმ სკოლებში დასაქმება, სადაც ამის განსაკუთრებული საჭიროებაა.

პროგრამის მიზანია კვალიფიციური კადრების მოზიდვის გზით სწავლა-სწავლების პროცესის ხელშეწყობა და განათლების მიღების თანაბარი შესაძლებლობების უზრუნველყოფა საქართველოს ყველა საჯარო სკოლაში.

სპეციფიკური მიზნებია:

• კვალიფიციურიკადრების მასწავლებლის პროფესიით დაინტერესება, მოზიდვა და ვაკანტური ადგილების შევსება;
• კონსულტანტ-მასწავლებლებისა და ადგილობრივი მასწავლებლებისთვის განათლების სფეროში მიმდინარე სიახლეების გაცნობისა და სწავლა-სწავლების თანამედროვე მეთოდების სასწავლო პროცესში დანერგვა-გამოყენების პროცესის ხელშეწყობა;
• მოსწავლეთა აკადემიური მოსწრების გაზრდა;
• ადგილობრივი თემის სასკოლო ცხოვრებაში ჩართულობის ხელშეწყობა.