მასწავლებელთა პროფესიული განვითარების ეროვნულმა ცენტრმა ინკლუზიური განათლების სპეციალისტებისათვის რეგიონული სასწავლო ტური დაიწყო. ტურის ფარგლებში პირველი სამუშაო შეხვედრა გაიმართა, სადაც ცენტრის მიზნობრივი პროგრამების სამსახურის უფროსმა, ნინო გორდეზიანმა მასწავლებლებს მასპინძელი სკოლები წარუდგინა და სასწავლო ტურის ამოცანები გააცნო.
სასწავლო ტური მიზნად ისახავს ინკლუზიური განათლების სპეციალისტების ცოდნისა და უნარების განვითარებას, რაც საშუალებას აძლევს რეგიონების სპეციალურ მასწავლებლებს, ინკლუზიური განათლების კოორდინატორებსა და ფსიქოლოგებს გაიზიარონ და შეისწავლონ ინკლუზიური განათლების მიმართულებით თბილისის ყველაზე წარმატებული სკოლების პრაქტიკა და გამოცდილება.
რეგიონული სასწავლო ტურის ფარგლებში მონაწილეები ხუთი დღის განმავლობაში გაეცნობიან სწავლების და სსსმ მოსწავლის კლასში ინტეგრაციის ეფექტიან სტრატეგიებს ასევე, დააკვირდებიან, თუ რა ფაქტორები განაპირობებს ინკლუზიური განათლების წარმატებას ამა თუ იმ სკოლაში.
სასწავლო ტურის მონაწილეთა შესარჩევი კონკურსი მასწავლებელთა პროფესიული განვითარების ეროვნულმა ცენტრმა მიმდინარე წლის სექტემბრის თვეში გამოაცხადა, რის შედეგადაც რეგიონებიდან შერჩეულია ინკლუზიური განათლების 30 სპეციალისტი.
სასწავლო ტური უკვე მესამედ ტარდება. ცენტრმა აღნიშნული პროექტის განხორციელება 2016 წელს დაიწყო.
|
24 ოქტომბერი , 2017
