მასწავლებელთა პროფესიული განვითარების ეროვნული ცენტრის ორგანიზებითა და ინიციატივით მიმდინარე მასწავლებელთა მეოთხე ეროვნული კონფერენცია დასრულდა.

კონფერენცია, სახელწოდებით “მოსწავლის გამჭოლი კომპეტენციის განვითარება”, ორი დღის განმავლობაში საერთო სესიებითა და თემატურ სექციებში წარმოდგენილი მოხსენებებით მიმდინარეობდა. ღონისძიებაში საჯარო და კერძო სკოლების ასამდე მასწავლებელი იყო ჩართული, ხოლო მოხსენებები წარმოადგინა ორმოცდაცხრამეტმა პედაგოგმა.

მოხსენებები სხვადასხვა თემატიკის მიხედვით იყო დაჯგუფებული: წიგნიერების განვითარება; ინტერკულტურული კომპეტენციების განვითარება; ციფრული და რაოდენობრივი წიგნიერების განვითარება; სწავლება კატასტროფების რისკების მართვის შესახებ (მათ შორის სპეციალური საგანმანათლებლო საჭიროებების მქონე მოსწავლეთათვის); ასევე, ეკოლოგიური წიგნიერების განვითარება.

კონფერენციაზე თემები წარმოადგინეს მასწავლებელთა პროფესიული განვითარების ეროვნული ცენტრის თანამშრომლებმაც, დემოკრატიული კულტურის კომპეტენციების, ზუსტ და საბუნებისმეტყველო მეცნიერებებში მოსწავლეთა შედეგების გაუმჯობესების, ექსპერიმენტებით სწავლებისა და ბუნების შემეცნებაში განათლების როლის შესახებ.

კონფერენციაზე საინტერესო ექსპოზიცია წარმოადგინა ატომური კვლევების ევროპულმა ორგანიზაციამ (CERN). მასწავლებლებს, კერძოდ, ფიზიკის პედაგოგებს შესაძლებლობა ჰქონდათ, გაცნობოდნენ ცერნის კოლაიდერის ამსახველ მხატვრულ ფოტომასალას, რომელიც სამყაროს წარმოშობის შესახებ სხვადასხვა ალეგორიებსა და ასოციაციებს შეიცავდა.

კონფერენციაში მონაწილეობის მისაღებად კონკურსი მიმდინარე წლის ოქტომბერში გამოცხადდა. მასწავლებელთა პროფესიული განვითარების ეროვნული ცენტრის საგნობრივმა კონსულტანტებმა შემოსული 300-მდე განაცხადიდან 59 საუკეთესო მოხსენება შეარჩიეს.