მასწავლებელთა პროფესიული განვითარების ეროვნულმა ცენტრმა საქართველოს დაწყებითი განათლების პროექტთან და უმაღლეს საგანმანათლებლო დაწესებულებებთან სამმხრივი ურთიერთთანამშრომლობის მემორანდუმი გააფორმა.

მემორანდუმის მიზანს წარმოადგენს თანამშრომლობა და შეთანხმებული მოქმედება G-PriED-ს, მასწავლებელთა პროფესიული განვითარების ეროვნულ ცენტრსა და საქართველოს უმაღლესი სასწავლებლებს შორის, რათა, თანამშრომლობის შესაძლებლობების გამოვლენისა და შესწავლის გზით, ხელი შეეწყოს კვალიფიციური და პროფესიონალი მასწავლებლების მომზადებას და მომავალი კადრების მოზიდვას.

მემორანდუმის ფარგლებში G-PriEd-ი და TPDC-ი უნივერსიტეტებს გაუწევენ შემდეგი სახის დახმარებას:

· უნივერსიტეტების შესაბამისი ფაკულტეტისა და ხარისხის უზრუნველყოფის სამსახურის წარმომადგენლებთან ერთად განიხილავენ არსებულ სასწავლო პროგრამას, მის სილაბუსებს და რეკომენდაციების სახით წარუდგენენ კომენტარებს ცვლილებებთან დაკავშირებით G-PriEd-ის მეთოდოლოგიისა და რესურსების გათვალისწინებით;

· G-PriEd-ი და მასწავლებელთა პროფესიული განვითარების ეროვნული ცენტრი სისტემატურად გაუწევენ კონსულტაციებს ფაკულტეტისა და საგანმანათლებლო პროგრამის მენეჯმენტის წარმომადგენლებს;

· მასწავლებელთა პროფესიული განვითარების ეროვნული ცენტრი და G-PriEd-ი დაეხმარებიან უნივერსიტეტებს სასწავლო კურსისა და განათლების პროგრამის სილაბუსების დასრულებაში;

· ფაკულტეტის წარმომადგენლებსა და სტუდენტებს მიეცემათ წვდომა G-PriEd-ის პორტალზე www.kargiskola.ge, ელექტრონული ტრენინგებისა და ელექტრონული საკლასო შეფასების სივრცის ჩათვლით.

· ფაკულტეტის წარმომადგენლებს გადაეცემათ საქართველოს დაწყებითი განათლების პროექტის მიერ დაბეჭდილი რესურსები;

· მასწავლებელთა პროფესიული განვითარების ეროვნული ცენტრი და საქართველოს დაწყებითი განათლების პროექტი (G-PriEd) განახორციელებენ სასწავლო პროგრამისა და კურსის მიმდინარეობის მონიტორინგს პირდაპირი დაკვირვების გზით, ხოლო, მონიტორინგის შედეგად მიღებულ ინფორმაციაზე დაყრდნობით, შეიმუშავებენ რეკომენდაციებს და წარუდგენენ ჩართულ მხარეებს.