მასწავლებელთა პროფესიული განვითარების ეროვნულმა ცენტრმა მასწავლებლის თვითშეფასების განახლებული კითხვარი დაამტკიცა. კითხვარის ელექტრონული ვერსიები მომზადებულია როგორც ქართულ, ისე რუსულ, სომხურ და აზერბაიჯანულ ენებზე.

კითხვარში ცვლილებები მასწავლებლებისა და განათლების ექსპერტების აზრის კვლევის შედეგად განხორციელდა. აღნიშნული მოსაზრებების გათვალისწინებით შემცირდა კითხვარის მოცულობა, გამარტივდა და უფრო მოსახერხებელი გახდა მისი სტრუქტურა, ასევე შემცირდა შესაფასებელი დებულებებისა და თვითრეფლექსიების რაოდენობა, დაიხვეწა ინდიკატორები და შეფასების სქემა.

თვითშეფასების კითხვარის მიზანია, რომ მასწავლებელმა ადეკვატურად შეაფასოს თავისი საქმიანობა, გამოკვეთოს და გააანალიზოს საკუთარი ძლიერი და სუსტი მხარეები, რისი გათვალისწინებითაც მას შეუძლია დაგეგმოს და მონაწილეობა მიიღოს პროფესიული განვითარების სხვადასხვა ღონისძიებებში.

თვითშეფასების კითხვარი ხელმისაწვდომია ყველა დაინტერესებულ პირისთვის. იგი განთავსებულია მასწავლებელთა პროფესიული განვითარების ეროვნული ცენტრის ვებ-გვერდზე: TPDC.GOV.GE - სქემის განყოფილებაში.