მასწავლებელთა პროფესიული განვითარების ეროვნულ ცენტრში პროფესიული განათლების სპეციალისტთა ტრენინგი მიმდინარეობს. ტრენინგს ის პირები გადიან, რომლებიც გერმანიის მთავრობის დაფინანსებით, მაგდებურგის უნივერსიტეტში სასწავლებლად გაემგზავრებიან.

ჯგუფის წევრებს საშუალება ექნებათ შეისწავლონ პროფესიული განათლების პოლიტიკა, პროფესიული განათლების მასწავლებლის მოსამზადებელი პროგრამები, სწავლების მეთოდიკა, კერძო სექტორთან მუშაობის გზები და პრინციპები და სფეროს სხვა მნიშვნელოვანი ასპექტები.

ერთწლიანი პროგრამის ფარგლებში, ჯგუფის წევრები სწავლის გარდა, შეიმუშავებენ კონკრეტულ პროექტებს სისტემაში დანერგვის მიზნით. გერმანიის მთავრობა ქართველ კოლეგებთან ერთად სასწავლებლად ასევე იწვევს პროფესიული განათლების სპეციალისტებს სომხეთიდან და აზერბაიჯანიდან.

გერმანიაში გამგზავრებამდე ჯგუფს უტარდება მოსამზადებელი ტრენინგები, რომლის ფარგლებშიც მონაწილეები ეცნობიან პროფესიული განათლების გერმანულ მოდელს და ევროპის სხვა ქვეყნების გამოცდილებასთან მის შედარებით ანალიზს. ტრენინგებს გერმანიიდან მოწვეული პროფესორები ატარებენ.