მასწავლებელთა პროფესიული განვითარების ეროვნული ცენტრის ორგანიზებით ბორჯომისა და ახალციხის სამუსიკო სკოლებში გაიმართა საინფორმაციო შეხვედრები მუსიკის მასწავლებლებისთვის, რომელიც ბავშვთა და ახალგაზრდული საგუნდო კოლექტივების მეორე რესპუბლიკურ კონკურსს მიეძღვნა.

შეხვედრას უძღვებოდნენ მასწავლებელთა პროფესიული განვითარების ცენტრის მუსიკის ექსპერტ-კონსულტანტი რუსუდან თაყაიშვილი, საქართველოს საგუნდო საზოგადოების თავმჯდომარე ლიანა ჭონიშვილი, საქართველოს ფოლკლორის სახელმწიფო ცენტრის ხალხური მუსიკის მიმართულების ხელმძღვანელი ნანა ვალიშვილი. შეხვედრებს, ასევე, რესურსცენტრებისა და კულტურის სამსახურების ხელმძღვანელები და ქალაქ ახალციხის მერი გიორგი კოპაძე ესწრებოდნენ. მათ მხარდაჭერა გამოხატეს კონკურსის მიმართ და დახმარება აღუთქვეს ორგანიზატორებს.

საქართველოს ბავშვთა და ახალგაზრდული საგუნდო კოლექტივების ეროვნული კონკურსი წელს მეორედ ტარდება. კონკურსის მიზანია აკადემიური საგუნდო სიმღერის პოპულარიზაცია, ეროვნული სასიმღერო ტრადიციების დაცვა, ბავშვთა და ახალგაზრდული საგუნდო კოლექტივების მხარდაჭერა და განვითარება, ქართველ კომპოზიტორთა შემოქმედების პოპულარიზაცია და საგუნდო შემსრულებლობაში ახალი სახელების აღმოჩენა.

კონკურსის ორგანიზატორია საქართველოს საგუნდო საზოგადოება, ხოლო მასწავლებელთა პროფესიული განვითარების ეროვნული ცენტრთან ერთად, კონკურსს მხარდამჭერთა შორის არიან თბილისის ვანო სარაჯიშვილის სახელობის სახელმწიფო კონსერვატორია, ევგენი მიქელაძის სახელობის ცენტრალური სამუსიკო სასწავლებელი, საქართველოს კულტურისა და ძეგლთა დაცვის სამინისტრო, საქართველოს განათლებისა და მეცნიერების სამინისტრო,საქართველოს ფოლკლორის სახელმწიფო ცენტრი და სხვა ორგანიზაციები.