მასწავლებლის საქმიანობის დაწყების, პროფესიული განვითარებისა და კარიერული წინსვლის სქემას დღეიდან სამეგრელო-ზემო სვანეთის რეგიონის საჯარო სკოლების დირექტორებს წარუდგენენ.

პირველი შეხვედრა უკვე შედგა აბაშის და სენაკის რაიონების საჯარო სკოლების დირექტორებთან. მასწავლებელთა პროფესიული განვითარების ეროვნული ცენტრის ექსპერტ-კონსულტანტებმა და ტრენერებმა შეკრებილ აუდიტორიას სრული ინფორმაცია მიაწოდეს სქემის თითეული ეტაპის, ახალი სისტემის დანიშნულებისა და მიზნების შესახებ.

სამეგრელო-ზემო სვანეთში შეხვედრები მიმდინარე კვირის ბოლომდე გაგრძელდება. მასწავლებელთა პროფესიული განვითარების ეროვნული ცენტრის წარმომადგენლები სქემას მარტვილის, ხობის, ზუგდიდის, წალენჯიხის, ჩხოროწყუსა და მესტიის საჯარო სკოლების დირექტორებსაც გააცნობენ.

მასწავლებელთა საქმიანობის დაწყების, პროფესიული განვითარებისა და კარიერული წინსვლის სქემა 2015 წლის სექტემბრიდან ამოქმედდება. ეს არის ერთიანი სისტემა, რომელიც მასწავლებლის თვითგანვითარებასა და მოსწავლის წარმატებაზეა ორიენტირებული. სქემა ითვალისწინებს როგორც პროფესიულ განვითარებას და პროფესიის მიმზიდველობის ზრდას, ისე მასწავლებელთა ანაზღაურების მატებას და ზოგადი განათლების ხარისხის გაუმჯობესებას.