სსიპ მასწავლებელთა პროფესიული განვითარების ეროვნული ცენტრის დირექტორმა გიორგი მაჩაბელმა პროგრამის „ქართული ენა მომავალი წარმატებისთვის“ მეექვსე ნაკადის 21 მონაწილეს სერტიფიკატები გადასცა. მოხალისე პედაგოგები ორი აკადემიური სემესტრის განმავლობაში სამცხე-ჯავახეთის, ქვემო ქართლისა და კახეთის არაქართულენოვან სკოლებში მოღვაწეობდნენ და წარმატებით დაასრულეს პროგრამა.

პროგრამას „ქართული ენა მომავალი წარმატებისთვის“ სსიპ მასწავლებელთა პროფესიული განვითარების ეროვნული ცენტრი ახორციელებს. პროექტი საქართველოში მცხოვრები ეთნიკური უმცირესობებისთვის სახელმწიფო ენის სწავლებაზეა ორიენტირებული და მისი ერთ-ერთი მნიშვნელოვანი კომპონენტი სამცხე-ჯავახეთის, ქვემო ქართლისა და კახეთის არაქართულენოვან სკოლებში ქართულენოვანი პედაგოგების წარგზავნაა. პროგრამის ფარგლებში არაქართულენოვან სკოლებში გაგზავნილია, როგორც ქართულის, ასევე ისტორიისა და გეოგრაფიის დამხმარე მასწავლებლები.

პროგრამის მონაწილე მოხალისე მასწავლებლები ადგილობრივ ოჯახებში ცხოვრობენ და შესაბამისი საგნის გაკვეთილებთან ერთად, სკოლის მოსწავლეები ჩართული ჰყავთ არაფორმალურ განათლებაშიც, შექმნილი აქვთ კლუბები, ხოლო ოჯახში თანაცხოვრების დროს ოჯახის წევრებს ქართული ენის სწავლაში ეხმარებიან.

პროგრამაში მონაწილეობა ბაკალავრის ხარისხის მქონე საქართველოს მოქალაქეს შეუძლია, რომლისთვისაც ქართული მშობლიური ენაა. არაქართულენოვან სკოლაში წარმატებული მუშაობის შემდეგ, სსიპ მასწავლებელთა პროფესიული განვითარების ეროვნული ცენტრი ბაკალავრის ხარისხის მქონე მონაწილეებს 100%-იანი სახელმწიფო სასწავლო სამაგისტრო გრანტით აფინანსებს.