მასწავლებლის სახლში გია მურღულიას წიგნის "საუბრები უფროსკლასელებთან" პრეზენტაცია გაიმართა, რომელსაც ქართული ენისა და ლიტერატურის, ისტორიისა და სამოქალაქო განათლების პედაგოგები ესწრებოდნენ.

წიგნში თავმოყრილია ავტორის ჩანაწერები, რომლებიც ახალგაზრდა თაობისათვის ყველაზე საინტერესო და მნიშვნელოვან თემებს ეხება. ეს არის მცირე ტექსტებზე დაფუძნებული იმპროვიზაციები, მასწავლებლებს მოსწავლეთა ფიქრის, მსჯელობისა და შეფასების კულტურის ჩამოყალიბებისა და განვითარების შესაძლებლობას რომ მისცემს. აქ ნახავთ წერილებს ლიტერატურაზე, ისტორიაზე, ზნეობაზე, ქცევის კულტურაზე, კონფლიქტებზე, თვითშეფასებაზე, თაობათა ურთიერთობაზე, სიბრძნესა და უმეცრებაზე - მოკლედ, ყველაფერ იმაზე, რაც ადამიანად ყოფნის სიამოვნებასაც ბადებს და სირთულესაც.

წიგნის წინასიტყვაობაში მისი რედაქტორი - გამორჩეული ქართველი ლიტერატურისმცოდნე და მწერალი როსტომ ჩხეიძე წერს:„უშუალო საბაბი ამ ჩანაწერების შექმნისა, უმეტესობა მცირე ესეებადაც რომ წარმოგვიდგება, გაკვეთილებზე წამოჭრილი თემები აღმოჩნდებოდა – ყმაწვილებს რაც აღელვებდათ და აინტერესებდათ, რის პასუხსაც ეძიებდნენ, რისი ნიუანსების გარკვევაც ეწადათ... და გია მურღულიას ერუდიციისა და ორატორული უნარის კაცი ამ თემებზე ააგებდა მრავალმხრივ საგულისხმო იმპროვიზაციებს, რომლის წარმმართველიც იქნებოდა ფიქრის გაზიარების სურვილი, გადმოცემის ისეთი მანერა, რაც შეიძლება მისანდობი რომ ყოფილიყო ახალგაზრდებისათვის, რათა მარტოდენ მსმენელებად კი არ დარჩენილიყვნენ, არამედ აჰყოლოდნენ მსჯელობის დინამიკას და ცხოველი მონაწილეობაც მიეღოთ ფიქრის გაგრძელებასა თუ საკმაოდ მწვავე დისკუსიაში.თავი ეგრძნოთ არა პატარებად, არამედ მსჯელობის სწორედაც სრულფასოვან მონაწილეებად“.

ყველა ის პედაგოგი ან მშობელი, რომელიც ამ წიგნს წაიკითხავს, შეძლებს ბავშვებთან ურთიერთობისა და საუბრისას ისეთი საინტერესო სადისკუსიო და შემეცნებითი გარემო შექმნას, რაც აუცილებლად შეუწყობს ხელს მოსწავლის გააზრებულ ჩართვას სასწავლო პროცესში და საკუთარი აზრის თავისუფალ გამოხატვას.